പശ്ചിമേഷ്യയില്‍ സമാധാനം കൊണ്ടുവരാനുള്ള ഒരേയൊരു മാര്‍ഗം പലസ്തീനെ രാഷ്ട്രമായി അംഗീകരിക്കുക മാത്രമാണെന്ന് സ്പാനിഷ് പ്രധാനമന്ത്രി പെഡ്രോ സാഞ്ചെസ് പറഞ്ഞു. കിഴക്കന്‍ ജറൂസലേം തലസ്ഥാനമായിക്കൊണ്ട് വെസ്ററ് ബാങ്കും ഗസ്സയും ഉള്‍പ്പെട്ടതാവണം പലസ്തീന് രാഷ്ട്രം. വേറിട്ടു കിടക്കുന്ന ഈ രണ്ട് ഭൂഭാഗങ്ങളെയും ഇടനാഴി വഴി ബന്ധിപ്പിക്കണമെന്നും സ്പാനിഷ് പ്രധാനമന്ത്രി നിര്‍ദേശം വച്ചു.
പലസ്തീനിലും ഇസ്രായേലിലും സമാധാനം പുന:സ്ഥാപിക്കാനുള്ള ലക്ഷ്യത്തോടെയാണ് രാഷ്ട്ര സ്ഥാപനത്തിന് അംഗീകാരം നല്‍കുന്നതെന്ന് സ്പാനിഷ് സര്‍ക്കാര്‍ വക്താവ് പിലാര്‍ അലേഗ്യ്ര പറഞ്ഞു. പലസ്തീനെ രാഷ്ട്രമായി അംഗീകരിച്ചതിന്‍റെ ഭാഗമായി ഐറിഷ് പാര്‍ലമെന്‍റിന് പുറത്ത് പലസ്തീന് പതാക ഉയര്‍ത്തി. പശ്ചിമേഷ്യയില്‍ സമാധാനം പുലരണമെങ്കില്‍ പലസ്തീന് രാഷ്ട്രമായി അംഗീകാരം വേണമെന്ന് നേരത്തെ നോര്‍വേ പ്രധാനമന്ത്രി ജോനസ് ഗഹ്ര്‍ സ്റേറാര്‍ പ്രസ്താവിച്ചിരുന്നു.
നേരത്തെ, നോര്‍വേയും അയര്‍ലന്‍ഡും സ്പെയിനും പലസ്തീന് രാഷ്ട്രമായി അംഗീകാരം നല്‍കുന്നതില്‍ പ്രതിഷേധിച്ച് ഇസ്രായേല്‍ മൂന്ന് രാഷ്ട്രങ്ങളില്‍ നിന്നും തങ്ങളുടെ അംബാസഡര്‍മാരെ തിരിച്ചുവിളിച്ചിരുന്നു. തീവ്രവാദത്തെ അംഗീകരിക്കുകയാണ് അയര്‍ലന്‍ഡും നോര്‍വേയും സ്പെയിനും ചെയ്യുന്നതെന്നാണ് ഇസ്രായേല്‍ വിദേശകാര്യ മന്ത്രി ഇസ്രായേല്‍ കാത്സ് പ്രതികരിച്ചത്.
അതേസമയം, പലസ്തീനെ രാഷ്ട്രമായി അംഗീകരിക്കാനുള്ള ബില്‍ ഡെന്മാര്ക്ക് പാര്‍ലമെന്‍റ് വോട്ടിനിട്ട് തള്ളി. സ്വതന്ത്ര രാജ്യമായി പരിഗണിക്കാന്‍ ആവശ്യമായ സാഹചര്യങ്ങള്‍ പലസ്തീന് ഇല്ലെന്ന് ഡാനിഷ് വിദേശകാര്യ മന്ത്രി ലാര്‍സ് ലോക്കി റാസ്മുസെന്‍ പറഞ്ഞു. നാല് ഇടത് പാര്‍ട്ടികളുടെ പിന്തുണയോടെയാണ് പാര്‍ലമെന്റില്‍ ബില്‍ അവതരിപ്പിച്ചത്. എന്നാല്‍, പാസാക്കാന്‍ ആവശ്യമായ ഭൂരിപക്ഷം ലഭിച്ചില്ല.
എന്നാല്‍, ഭാവിയില്‍ പലസ്തീന് രാഷ്ട്രസ്ഥാപനത്തെ പിന്തുണയ്ക്കാന്‍ കഴിയുന്ന ഒരു ദിവസം വരുമെന്നും റാസ്മുസെന്‍ പ്രതീക്ഷ പ്രകടിപ്പിച്ചു. ബില്ലിലെ വോട്ടെടുപ്പില്‍ നിന്ന് അദ്ദേഹം വിട്ടുനിന്നു.
Comments: